அமெரிக்காவின் புதிய அதிபராக தெரிவு செய்யப்பட்டுள்ள ஜோ பைடன் அமைத்த கொரோனா தடுப்பு சிறப்பு குழுவில் தமிழகத்தை சேர்ந்த பெண் மருத்துவர் இடம் பெற்றுள்ள நிலையில், அந்த பெண்ணின் அண்ணன் பெருமையாக இருப்பதாக கூறியுள்ளார்.

கடந்த 3-ஆம் திகதி நடைபெற்று முடிந்த அமெரிக்க அதிபர் தேர்தலில், ஜனநாயக கட்சியைச் சேர்ந்த ஜோ பைடன் வெற்றி பெற்றார்.

இதையடுத்து அவர், கொரோனா தொற்றை எதிர்த்து போரிட கொரோனா டாஸ்க் போர்ஸ் என்ற சிறப்பு மருத்துவ குழுவை அமைத்துள்ளார்.

இந்த குழுவில் தமிழகத்தின், ஈரோடு மாவட்டம் மொடக்குறிச்சி பகுதியை சேர்ந்த பெண் மருத்துவர் செலின் கவுண்டர் (45) இடம்பெற்றுள்ளார்.

இது, ஈரோடு மாவட்ட மக்களுக்கு மட்டுமின்றி, இந்திய மக்களுக்கு பெருமை சேர்ப்பதாக அமைந்துள்ளது.

மருத்துவர் செலின் கவுண்டரின் அண்ணன் தங்கவேல் (64) மொடக்குறிச்சியில் வசிக்கிறார். இவர், தமிழ்நாடு குடிநீர் வடிகால் வாரிய செயற்பொறியாளராக பணியாற்றி ஓய்வுபெற்றவர்.

இவர் இது குறித்து கூறுகையில், மருத்துவர் செலின் கவுண்டர், எனது சித்தப்பா மகள். 1966-ஆம் ஆண்டு மருத்துவர் செலினின், தந்தை ராஜ்கவுண்டர் அமெரிக்காவின் போயிங் விமான தயாரிப்பு நிறுவனத்தில் இயக்குநராக பணியாற்றி வந்தார்.

இதையடுத்து செலின் குடும்பம், அமெரிக்கா குடியுரிமை பெற்று அங்கேயே வசித்து வருகிறது. செலின் உலக புகழ்பெற்ற தொற்றுநோய் நிபுணர். மருத்துவ பத்திரிகையாளர், திரைப்பட தயாரிப்பாளர் என பன்முக திறமை கொண்டவர்.

தற்போது நியூயார்க் பல்கலைக்கழகத்தில் மருத்துவ துறையில், மருத்துவ உதவி பேராசிரியராக பணியாற்றி வருகிறார்.

முன்னணி தொலைக்காட்சிகளில் மருத்துவ நிபுணராகவும், ஆய்வாளராகவும் தகவல் பரிமாறி வருகிறார். ஏற்கனவே அமெரிக்கா அமைத்த எபோலா தடுப்பு குழுவிலும் இடம் பெற்றிருந்தார்.

தற்போது கொரோனா தடுப்பு குழுவில் உறுப்பினராக நியமித்து, புதிய அதிபர் ஜோ பிடன் உத்தரவிட்டுள்ளார். தனது தந்தை பெயரில் அமைக்கப்பட்டுள்ள அறக்கட்டளை மூலம் சொந்த ஊருக்கு தேவையான கல்வி, சுகாதாரம் உள்ளிட்ட மேம்பாட்டு பணிகளை மேற்கொண்டு வருகிறார்.

அவர் கொரோனா டாஸ்க் போர்ஸ் குழுவில் உறுப்பினராக இடம் பெற்றிருப்பது எங்களுக்கு மிகவும் மகிழ்ச்சியாகவும், பெருமையாகவும் உள்ளதாக கூறியுள்ளார்.

…